Трамп Ўзбекистонга келиши мумкин
Бу ҳақда АҚШнинг Ўзбекистондаги элчиси маълум қилди.
Ўзбекистон ташқи ишлар вазири Бахтиёр Саидов ва Президентнинг махсус вакили Абдулазиз Комилов бошчилигидаги делегация АҚШга ташрифи чоғида Доналд Трамп номига президент Шавкат Мирзиёевдан расмий таклиф етказилди. Бу ҳақда АҚШнинг Ўзбекистондаги элчиси Жонатан Хеник маълум қилди.
"Трамп маъмурияти бу таклифдан мамнун бўлди ва уни жиддий кўриб чиқмоқда", — деди элчи 24 апрель куни журналистлар билан учрашувда. “Ўйлайманки, ҳозир АҚШ президентининг Марказий Осиёга ташриф буюриши учун энг тўғри вақт,” — дея қўшимча қилди у.
Шунингдек, Хеник "С5+1" саммити доирасида ҳам бу ташриф амалга ошиши мумкинлигини истисно қилмади. АҚШ президенти ҳали-ҳанузгача Марказий Осиёга расмий сафар қилмаганини инобатга олсак, бу ташриф тарихий аҳамият касб этади.
