Трампнинг “Ferrari” машинаси аукционга қўйилди
Унинг бошланғич нархи 1 млн долларга баҳоланмоқда.
АҚШда президент Доналд Трампга тегишли “Ferrari F430 Coupe” спорткари аукционга қўйилди.
Трамп ушбу автомобилни 2007 йилда ишлаб чиқарилиши биланоқ харид қилган. Аммо сиёсатчи автомобилни қанча муддатда ишлатгани ҳақида маълумот йўқ.
Спорткарнинг бошланғич баҳоси 1 миллион доллар қилиб белгиланган. Бу нарх бозордаги ўхшаш моделлардан беш баравар қимматроқ. Германияда шундай автомобиллар одатда 150–180 минг долларга сотилади.
Аукцион уйи маълумотига кўра, “Ferrari” жуда яхши ҳолатда, аварияларга учрамаган ва бўёқлари махсус плёнка билан ҳимояланган. Автомобиль қизил рангда, ички қисми оч жигарранг бўлиб, механик узатмалар қутисига эга. Машина 100 км/соат тезликка 3,9 сонияда эришади ва унинг максимал тезлиги 315 км/соатни ташкил қилади.
Аукцион 16 февралдан 9 мартга қадар давом этади, ҳозирнинг ўзида Rockstar сайтида машинага таклифлар қабул қилинмоқда.
Комила Одилова тайёрлади
