Украина мудофаа вазири: БМТ фаолиятини тўхтатиши керак
Шунингдек, у янги халқаро институтлар тузиш вақти келганини айтган.
Европа хавфсизлик ва ҳамкорлик ташкилоти (ЕХҲТ) ва БМТ бошқа самаралироқ институтларга алмаштирилиши керак. Бу ҳақда Украина мудофаа вазири Алексей Резников маълум қилди.
Резниковнинг The Wall Street Journal газетасига ёзган мақоласида шу ҳақда сўз боради.
"Бу ташкилотлар барбод бўлди. Уларга қадар фаолият юритган Миллатлар Лигаси каби, ушбу тузилмалар ҳам янги ва самаралироқ, фақатгина ўта қудратли давлатлар эмас, балки барча мамлакатлар манфаатларига хизмат қиладиган халқаро институтларга алмашиши керак", — деб қайд этган вазир.
У янги тузилмада таҳдидларга автоматик муносабат билдириш механизми бўлишини таклиф қилган. Унга кўра, ҳар қандай агрессор низо бошланиши билан олдиндан тайёрлаб қўйилган санкциялар орқали жазоланади. Резниковнинг сўзларига кўра, агар шу каби чоралар Россияга қарши олдиндан кўрилганда эди, ҳозир вазият бутунлай бошқача бўлган бўларди.
Аввалроқ Япония бош вазири Фумио Кисида янги дунё тартиботини яратиш вақти келганини айтганди.
