“UzAuto Motors” “Chevrolet Lacetti” автомобили ишлаб чиқариш ҳажмини оширди
“UzAuto Motors” “Chevrolet Lacetti” автомобили ишлаб чиқаришни 12,5 фоизга оширди. Бу ҳақда корхона ўзининг Telegram-каналида маълум қилди.
Унда айтилишича, шу йилнинг сентябрь ойида компания “Chevrolet Lacetti” автомобилининг ишлаб чиқариш линияларида оптимизация ишларини олиб борган. Амалга оширилган ишлар натижасида, “Chevrolet Lacetti” автомобилининг ишлаб чиқариш ҳажми кунига ўртача 280 дан 320 тага етган.
Линияларнинг модернизация қилиниши ойига 1000 дона автомобиль ишлаб чиқариш имконини беради.
“Ишлаб чиқаришнинг кўпайиши юзага келаётган навбатларни қисқартиради ва мижозларга ушбу оммабоп автомобилни қисқа муддатларда етказиб беришни таъминлайди”, – дейилади компания хабарида.
Бундан аввал “UzAuto Motors”нинг соф фойдаси қарийб 70 фоизга ўсгани, “UzAuto Motors” “Chevrolet Lacetti” ва “Spark” ишлаб чиқаришни тиклагани ҳамда депутат Кушeрбаев “UzAuto Motors”ни танқид қилгани ҳақида хабар берилганди.
Оламгир Абдиев
