Вашингтон Россиядан буғдой экспортини қўллаб-қувватлайди
Бу ҳақда АҚШнинг БМТдаги махсус вакили маълумот берди.
АҚШ Россиядан ғалла экспорт қилинишини қўллаб-қувватлайди. Бу ҳақда Вашингтоннинг БМТдаги доимий вакили Линда Томас-Гринфилд маълум қилди.
“Биз бу ҳаракатларни қўллаб қувватлаймиз. Шунингдек, БМТнинг савдо ва тараққиёт бўйича Конференцияси бош котиби Ребекка Гринспеннинг Россия ва АҚШга ташрифини ҳам олқишлаймиз. Бу РФдан ғалла ва ўғит олиб чиқишга иккиланиб турган компаниялар учун яхши туртки бўлишига умид қиламиз”, – деган дипломат.
Шу билан бирга у ғалла ва минерал ўғитларга нисбатан Ғарб санкциялари жорий этилмаганини, аммо компаниялар “асабийлашаётган”ини таъкидлаган.
Томас-Гринфилднинг қўшимча қилишича, АҚШ Россиядан буғдой олиб чиқмоқчи бўлган компанияларга ёзма кафолат беришга тайёр.
Аввалроқ Москва буғдойни рублда сотмоқчи эканлиги тўғрисида хабар берилганди.
