ҲАМАС Трампнинг тинчлик режасини қайта кўриб чиқишни талаб қилмоқда
Доҳадаги учрашувларда гуруҳ якуний қарорни икки-уч кун ичида қабул қилиши кутилмоқда.
ҲАМАС ҳаракати АҚШ президенти Дональд Трамп томонидан тақдим этилган Ғазо сектори бўйича тинчлик режасига эътироз билдириб, ҳужжатнинг айрим бандларини қайта кўриб чиқишни талаб қилмоқда. Бу ҳақда AFP манбаларига таяниб хабар қилинмоқда.
Ташкилот вакилларининг маълум қилишича, уларнинг асосий талаблари қуйидагилардан иборат: ҲАМАС аъзоларини ва фракцияларини мажбурий қуролсизлантириш жараёнини тўхтатиш, Исроил қўшинларининг ҳудуддан тўлиқ олиб чиқилишига халқаро кафолат бериш ҳамда фаластинликларнинг Ғазо ичида ва ташқарисида хавфсизлигини таъминлаш.
Манбаларга кўра, ҲАМАС ичида икки хил позиция мавжуд: айрим раҳбарлар оташкесим кафолатини асосий шарт сифатида кўриб, режани қўллаб-қувватлашга тайёрлигини билдирган. Бошқа қанот эса Ғазони “босиб олиш қонунийлаштирилмаслиги” ва “қаршилик жиноят сифатида талқин қилинмаслиги”ни талаб қилмоқда.
Музокаралар давом этмоқда бўлиб, ҳаракатнинг якуний позицияси яқин кунларда эълон қилиниши кутилмоқда. 30-сентябр куни ҲАМАС вакиллари Доҳада Туркия, Миср ва Қатар расмийлари билан учрашув ўтказган. Манбаларга кўра, гуруҳ қарорни икки-уч кун ичида шакллантиради.
Эслатиб ўтамиз, 29 сентябр куни Оқ уйда АҚШ президенти Дональд Трамп ва Исроил бош вазири Биньямин Нетаняху ўртасида музокаралар бўлиб ўтган эди. Учрашув якунида Ғазо бўйича 21 банддан иборат тинчлик режаси эълон қилинган.
