Хитой собиқ дипломати АҚШга ядро уруши билан таҳдид қилди
Хитой АҚШга ядро зарбалари билан таҳдид қилди. “Daily Mail” хабарига кўра, Хитойнинг БМТдаги собиқ элчиси Ша Цзукан шундай баёнот билан чиққан.
Цзуканнинг бу таҳдиди АҚШнинг Австралия ва Буюк Британия билан тузган альянсига қарши ўзига хос жавоб бўлди. Дипломат Вашингтон билан ўтмишдаги келишув — биринчи бўлиб ядро зарбалари бермаслик тўғрисидаги шартномани қайта кўриб чиқишга чақирди. Чунки АҚШнинг Хитой атрофида ҳарбий фаоллиги тобора ошиб бормоқда. Унинг сўзларига кўра, Пекиннинг ҳозирги сиёсати “маънавий обрў” олиб келиши мумкин. Аммо Вашингтоннинг минтақа хавфсизлигига хавф туғдираётган сиёсатига муносиб жавоб бўла олмайди.
16 сенятбрь куни АҚШ Австралия ва Буюк Британия билан янги ҳарбий альянс тузилганини эълон қилди.
Экспертларнинг фикрича, бу иттифоқ Хитойнинг ўсиб бораётган таъсирига қарши қаратилган. Хитойнинг АҚШдаги элчихонаси, ўз навбатида, Вашингтонни “совуқ уруш” даврини эслатмасликка чақирди.
Бундан аввал “Осиё НАТО"си учрашуви ташкил этилгани хабар қилинганди.
Жаҳонгир Қўзиев
