Хитойнинг йирик авиаташувчиси — Air China авиакомпанияси Ўзбекистонга мунтазам авиапарвозларни амалга ошириш учун расмий рухсатнома олди. Бу ҳақда “Ўзавиация” агентлиги Матбуот хизмати хабар берди.
Қайд этилишича, 1994 йил 19 апрелда имзоланган Ўзбекистон ва Хитой ўртасидаги ҳаво қатнови тўғрисидаги ҳукуматлараро Битим асосида Air China компаниясига Пекин–Тошкент–Пекин ва Урумчи–Тошкент–Урумчи йўналишларида мунтазам авиапарвозлар учун фойдаланиш рухсатномаси берилган.
Парвозлар Boeing-737-800/8 (MAX) ва Airbus-330-300/200 самолётларида амалга оширилади.
Аввалроқ хабар берилганидек, Uzbekistan Airports июль ойидан бошлаб мазкур ҳар бир йўналиш бўйича ҳафтасига 3 марта парвозларни йўлга қўйган.
Эслатиб ўтамиз, жорий йилнинг 1 июнидан бошлаб Ўзбекистон ва Хитой ўртасида 30 кунлик визасиз режим амалда.
Ҳозирги вақтда икки давлат ўртасида 5 та авиакомпания – Uzbekistan Airways, Қанот Шарқ, Centrum Air, China Southern Airlines ва Loong Air томонидан ҳафтасига жами 29 та тўғридан-тўғри рейслар амалга оширилмоқда.