Хонанда Миродил Ҳакимов жаримага тортилди
У «Уйланамиз» қўшиғини шеър муаллифи рухсатисиз ижро этган.
Андижон вилояти адлия бошқармасининг хабар беришича, жорий йилнинг 25 май куни шоир Эркин Йўлдош вилоят Адлия бошқармасига мурожаат қилиб, Андижон шаҳрида яшовчи фуқаро Миродил Ҳакимов ҳеч қандай рухсат ва огоҳлантиришсиз «Уйланамиз» шеърига басталанган қўшиқни 25 йилдан бери ижро этиб келаётганлигини ва шеър матнини ўзгартирганлигини билдирган.
Мурожаатда келтирилган ҳолатларни ўрганиш жараёнида хонанда Эркин Дориповга тегишли бўлган «Уйланамиз» номли шеърни муаллиф билан ҳеч қандай шартнома тузмасдан ҳуқуқ эгасининг рухсатисиз омма эътиборига ҳавола қилган. Мазкур ҳолат юзасидан Жиноят ишлари бўйича Андижон туман судига баённома киритилган.
Натижада суд хонанда М. Ҳакимовни Маъмурий жавобгарлик тўғрисидаги кодекснинг 177(1)–моддасида назарда тутилган маъмурий ҳуқуқбузарликни содир қилган деб топиб, базавий ҳисоблаш миқдорининг 5 баробари миқдорда жарима жазоси тайинлаган.
Эслатиб ўтамиз, аввалроқ Бобомурод Ҳамдамов қўшиқларини унинг рухсатисиз куйлаган хонандалар жаримага тортилгани хабар қилинганди.
