Хоразмда металломга топширилган снаряд портлаб кетди
Ҳодиса оқибатида бир киши ҳалок бўлган.
11 апрель куни Хоразм вилояти, Янгиариқ туманидаги металлом қабул қилиш шохобчасида снаряд портлаши оқибатида 31 ёшли ишчи ҳалок бўлди. Портлаш йиғилган темирлар туширилаётган вақтда содир бўлган.
Вафот этган O.B. икки фарзанднинг отаси бўлиб, оила боқувчиси бўлган. Интернетда тарқалган видеода унинг онаси ҳодиса учун масъулларга қатъий жазо берилишини сўради.
Манбага кўра, портлаган снарядлар Қорақалпоғистоннинг Амударё туманидаги ҳарбий хизматчилардан ноқонуний тарзда сотиб олинган. Воқеани ўрганиш чоғида шохобчадан яна 30 га яқин снаряд топилган.
Ҳозирда иш билан ҳарбий прокуратура шуғулланмоқда. Ҳарбий хизматчилар ва металлом йиғувчиларга нисбатан тергов бошланган, айрим шахслар қамоққа олинган.c
