Наманганда ЙТҲ сабаб 75 ёшли пиёда вафот этди
“Damas” русумли автомобиль ҳайдовчиси бошқарувни йўқотиши оқибатида йўлдан ўтаётган 75 ёшли пиёдани уриб юборган. Бу ҳақда Наманган вилояти ИИБ ахборот хизмати хабар берди.
Унда айтилишича, жорий йилнинг 1 октябрь куни соат 13:45 да Янгиқўрғон тумани “Сутлибулоқ” маҳалласи ҳудудида “Дамас” ҳайдовчиси автоулов ҳаракатини таъминлай олмай, бошқарувни йўқотган. Оқибатда йўлни кесиб ўтаётган 1946 йилда туғилган фуқарони уриб юборган.
75 ёшли пиёда олган турли тан жароҳатлари сабаб шифохонада вафот этган.
Ушбу ҳолат бўйича Янгиқўрғон туман ИИБ ҳузуридаги тергов бўлинмаси томонидан Жиноят кодексининг 266-моддаси 2-қисми билан жиноят иши қўзғатилган.
Бундан аввал Нукусда "Matiz" ҳайдовчиси маст пиёдани уриб юборгани, Сурхондарёда пиёдаларни уриб, қочиб кетган ҳайдовчи ушлангани ҳамда Наманганда "Nexiа" ҳайдовчиси йўлдан ўтаётган 22 ёшли пиёданинг ўлимига сабабчи бўлгани ҳақида хабар берилганди.
Оламгир Абдиев
