Юнусободда қалбаки «Ремдесивир» дорисини 4 700 АҚШ долларига сотаётган шахслар ушланди
Қалбаки «Пандовир 100 (Ремдесивир)» дори воситасини тайёрлаб сотаётган шахсларнинг кирдикорлари фош бўлди, дея хабар бермоқда Бош прокуратура ҳузуридаги департамент матбуот хизмати.
Қайд этилишича, департамент ҳамда ДСҚнинг Юнусобод тумани бўлимлари томонидан тезкор тадбир ўтказилган. Унда, фуқаро Д.А. ва бошқалар олдиндан тил бириктириб «Bactopraz-S» дори воситаси ёрлиғини ўзгартириш орқали тайёрланган қалбаки «Пандовир 100 (Ремдесивир)»дори воситасини ҳар бирини 500 минг сўмдан ҳисоблаб, тўловни АҚШ долларида амалга оширишга келишиб, 100 дона қалбаки «Пандовир 100 (Ремдесивир)» дори воситасини 4 700 АҚШ долларига сотган вақтида ашёвий далиллар билан ушланган.
Шунингдек, тадбир давомида юқоридаги дори воситалари Чилонзор тумани, Муқимий кўчасидаги хонадонлардан бирида тайёрланганлиги аниқланиб, ушбу хонадондан 23 турдаги қалбаки дори воситалари ҳамда 500 дона ёрлиқлар ашёвий далил сифатида олинган.
Мазкур ҳолат юзасидан Жиноят кодексининг 186-3-моддаси (сифатсиз ёки қалбакилаштирилган дори воситаларини ёхуд тиббий буюмларни ўтказиш мақсадида ишлаб чиқариш, тайёрлаш, олиш, сақлаш, ташиш ёки ўтказиш) билан жиноят иши қўзғатилиб, тергов ҳаракатлари ўтказилмоқда.
