Turkiya tashqi ishlar vaziri Farg‘onaga keldi
Turkiya tashqi ishlar vaziri Farg‘onaga keldi.
Avval xabar berganimizdek, 15-16 iyul kunlari Toshkentda bo‘lib o‘tadigan «Markaziy va Janubiy Osiyo: mintaqaviy o‘zaro bog‘liqlik. Tahdid va imkoniyatlar» mavzusidagi xalqaro konferensiyada ishtirok etish uchun mamlakatimizga kelgan Turkiya tashqi ishlar vaziri Mevlyut Chavushog‘lu o‘z safarini Farg‘onadan boshladi.
Bugun, 14 iyul kuni Turkiya tashqi ishlar vaziri Istanbuldan Farg‘onaga uchib keldi. Yuqori martabali mehmonni Farg‘ona xalqaro aeroportida O‘zbekiston Madaniyat vaziri Ozodbek Nazarbekov, Turizm va sport vazirining birinchi o‘rinbosari Ulug‘bek Aʼzamov, Farg‘ona viloyati hokimining o‘rinbosari Iqboljon Ergashev, Farg‘ona shahar hokimi Mirzohid Ubaydullayev, O‘zbekistonning Turkiyadagi favqulodda va muxtor elchisi Alisher Aʼzamxo‘jayev hamda Turkiyaning O‘zbekistondagi favqulodda va muxtor elchisi Olgan Bekar va boshqa rasmiylar tantanali kutib oldilar.
Tashrif rejasiga ko‘ra kun davomida Turkiya tashqi ishlar vaziri Marg‘ilondagi Hunarmandlar markazini hama Oltiariq tumanidagi uzumchilik bog‘larini borib ko‘radi, Qo‘qondagi Xudoyorxon saroyi hamda Jome majmuasi bilan tanishadi.
Mevlyut Chavushog‘lu bugun kech soatlarda Farg‘onaga tashrifini yakunlab, ertaga boshlanadigan xalqaro konferensiyada ishtirok etish uchun Toshkentga uchib ketadi.
