Bog‘chalardagi bolalarda ko‘z kasalligi tarqalayaptimi?
Toshkent viloyati SSB tarqalayotgan xabarlarga munosabat bildirdi.

Ijtimoiy tarmoqlarda Toshkent viloyatidagi maktabgacha ta’lim tashkilotlarida bolalar o‘rtasida ko‘z kasalligi tarqalayotgani haqida xabarlar tarqaldi. Viloyat sog‘liqni saqlash boshqarmasi ushbu xabarlar yuzasidan rasmiy munosabat bildirdi.
Ma’lum qilinishicha, 10-noyabr kuni Parkent tumanidagi 3-sonli maktabgacha ta’lim tashkilotiga 2022-yilda tug‘ilgan bola ko‘z kasalligi alomatlari bilan kelgan. Bog‘cha ma’muriyati bolani muassasa hududiga kiritmagan va shifokor ko‘rigiga yuborgan.
Tuman oftalmologi ko‘rigidan so‘ng bolaga “H10.3 — aniqlanmagan o‘tkir konyunktivit” tashxisi qo‘yilib, tegishli davolash muolajalari belgilangan. Shuningdek, uning akasi va otasida ham shunga o‘xshash alomatlar kuzatilgan. Ayni paytda ularga tuman tibbiyot birlashmasi tomonidan tibbiy yordam ko‘rsatilmoqda.
SSB ma’lumotiga ko‘ra, ko‘z kasalligi alomatlari bilan murojaat qilgan boshqa bemorlar qayd etilmagan. Bog‘cha ma’muriyati ham boshqa tarbiyalanuvchilarda bunday belgilar kuzatilmaganini bildirgan.
Shu munosabat bilan ota-onalardan farzandlarining salomatligiga e’tiborli bo‘lish, ko‘zda qizarish, yoshlanish yoki ajralma kelishi kabi alomatlar paydo bo‘lsa, o‘z vaqtida shifokorga murojaat qilish so‘raldi.








