Yevropaliklarni chuv tushirgan: Toshkentda yashirin call-markaz aniqlandi
Markaz xorijliklarga soxta hujjatlar va treyding bo‘yicha treninglar taklif qilib, kriptoaktivlarini o‘zlashtirgan.

Toshkent shahrining Yashnobod tumanida xorijiy fuqarolarni aldash orqali kriptoaktivlarini o‘zlashtirgan 10 kishilik noqonuniy onlayn call-markaz faoliyati to‘xtatildi. Bu haqda Toshkent shahar Ichki ishlar bosh boshqarmasi matbuot xizmati xabar berdi.
Dastlabki ma’lumotlarga ko‘ra, guruh a’zolari messenjerlar orqali Yevropa davlatlari fuqarolarining ishonchiga kirib, soxta hujjatlar tayyorlash, treyding va kriptoaktivlar bo‘yicha treninglar taklif qilgan. Shundan so‘ng aldov yo‘li bilan ularning kriptoaktivlarini o‘zlarining elektron hamyonlariga o‘tkazib, o‘zlashtirgan.
Tezkor tadbir davomida 8 ta noutbuk, 58 ta telefon va 3 ta kompyuter qurilmasi ashyoviy dalil sifatida olib qo‘yilgan. Shuningdek, guruh a’zolarining poytaxtda vaqtincha ro‘yxatdan o‘tmasdan yashab kelgani aniqlangan.
Ular tomonidan 231 134 USDT, ya’ni qariyb 2 milliard 432 million so‘mlik kriptoaktivlar aylanmasi bilan qonunga xilof ravishda shug‘ullanilgani ma’lum bo‘lgan.
Mazkur holat yuzasidan Yashnobod tumani IIO FMB tomonidan Jinoyat kodeksining 278-8-moddasi bilan jinoyat ishi qo‘zg‘atilib, tergov harakatlari davom ettirilmoqda.








