2022-yil 1-yanvaridan ayrim davlat xizmatlari uchun to'lov undirilmaydi
Prezident farmoniga ko‘ra, 2022 yil 1 yanvardan xorijga chiqish pasporti, tadbirkorlik subyektlarini ro‘yxatdan o‘tganligi to‘g‘risida yangi namunadagi guvohnoma, advokatlik byuro, firma va hayʼatlarini ro‘yxatdan o‘tkazish uchun to‘lov miqdorlari arzonlashtiriladi. Xususiy bandlik agentliklari reyestriga kiritish xizmati esa bepul bo‘ladi.
Qarorga muvofiq 1 yanvardan boshlab bir qator davlat xizmatlar uchun undiriladigan to‘lovlar kamaytiriladi va ayrimlari uchun to‘lov bekor qilinadi. Bu prezidentning 24 iyuldagi farmonida belgilab qo‘yildi.
Yangi yildan O‘zbekiston fuqarolariga xorijga chiqish uchun biometrik pasport olish xizmati narxi BHMning 1 baravari — 245 ming so‘m (hozirda BHMning 1,2 baravari — 294 ming so‘m) etib belgilanmoqda.
Tadbirkorlik subyektlariga davlat ro‘yxatidan o‘tkazilgani to‘g‘risida yangi namunadagi guvohnoma berish BHMning 20 foizi — 49 ming so‘mni (hozirda BHMning 1 baravari — 245 ming so‘m) tashkil etadi.
Advokatlik byurolarini, advokatlik firmalarini va advokatlar hayʼatlarini davlat ro‘yxatidan o‘tkazish uchun BHMning 1 baravari — 245 ming so‘m to‘lov (hozirda BHMning 2 baravari — 490 ming so‘m) undiriladi.
Shuningdek, xususiy bandlik agentliklari reyestriga kiritish yangi tartib bilan bepul (hozirda BHMning 1 baravari — 245 ming so‘m) bo‘ladi.
Bundan tashqari, hujjat bilan 1 yanvardan boshlab davlat xizmatlarini ko‘rsatganlik uchun undiriladigan davlat bojlari, yig‘imlar va boshqa har qanday to‘lovlarning xizmat ko‘rsatish uchun masʼul davlat organlari va tashkilotlari hisobiga yo‘naltiriladigan qismining kamida 20 foizi ushbu tashkilotda axborot texnologiyalarini rivojlantirish, shuningdek, qog‘oz ko‘rinishdagi hujjatlarni raqamlashtirish uchun yo‘naltiriladi. Va buni Moliya vazirligi Axborot texnologiyalari va kommunikatsiyalarini rivojlantirish vazirligi bilan birgalikda doimiy ravishda monitoring qilib boradi.
