Dunyoning eng boy odamlari ro‘yxati o‘zgardi
“Forbes Real-Time” reytingining yangilangan maʼlumotlariga ko‘ra, “Amazon” asoschisi Jeff Bezos 24 soat ichida kompaniyaning qimmatli qog‘ozlari qiymatining pasayishi tufayli deyarli 14 milliard dollar yo‘qotib, dunyodagi eng boy odam maqomidan pastladi.
Bu haqda “gazeta.ru” xabar berdi.
Taʼkidlanishicha, boyligi 192,4 milliard dollarga baholangan Bezos 6,76 foiz mablag‘ini yaʼni 13,9 milliard dollarini yo‘qotgan. Endi reytingda birinchi o‘rinda “Louis Vuitton Moët Hennessy” (LVMH) egasi Bernard Arno bor, uning boyligi “Forbes” maʼlumotlariga ko‘ra 192,9 milliard dollarga teng.
Uchinchi o‘rinda “SpaceX” kosmik kompaniyasi asoschisi va “Tesla” bosh direktori Elon Mask turibdi. Uning boyligi 179,4 milliard dollarga yetdi. 30 iyul kuni “Amazon” aksiyalarining qiymati 7,56 foizga tushib, har bir aksiya qiymati 3,3 ming dollarni tashkil etdi.
Bu pasayish, kompaniya 2021 yilning ikkinchi choragi uchun hisobotlarini eʼlon qilganidan so‘ng yuz berdi, “Amazon”da daromadlar o‘sishi bo‘yicha tahlilchilar kutgandek natija bo‘lmadi. Shuningdek, 5 iyul kuni 57 yoshli Jeff Bezos “Amazon” bosh direktori lavozimini tark etgan.
