Sportchilarimiz virusdan o‘zini qanday himoya qilmoqda?
Dzyudo bo‘yicha jahon chempionatining kumush va bronza medallari sohibi, Olimpiyada-2020 sovrindori Davlat Bobonovning so‘zlariga ko‘ra, sport nafaqat koronavirus, balki barcha kasalliklarning oldini olishda muhim o‘rni tutadi.
Avvalroq, Paralimpiyachilarimizda “Narita” aeroportida olingan test natijalariga ko‘ra, ikki kishi — dzyudo bo‘yicha bir nafar sportchi va murabbiyda koronavirus infeksiyasi aniqlangani haqida xabar bergandik.
Maʼlumotlarga ko‘ra, Tokioda COVID-19‘ga chalingan sportchilar karantinga olingan va mashg‘ulotlarni alohida olib bormoqda. Musobaqalarda ishtirok etishga hech qanday to‘sqinlik yo‘q. Kundan-kunga geografiyasi kengayib borayotgan koronavirus manzil va makon, yoshu-qarini tanlamayapti. Barchani birdek o‘z domiga tortmoqda. Faoliyat turiga ko‘ra ko‘plab xorijiy mamlakatlarda bo‘ladigan, bir vaqtning o‘zida begonalar bilan yaqin aloqada bo‘ladigan sportchilarimiz virusdan o‘zlarini qanday himoya qilishmoqda? Haqli savol bilan Olimpiyada ishtirokchilariga yuzlandik.
Dzyudo bo‘yicha jahon chempionatining kumush va bronza medallari sohibi, Olimpiyada-2020 sovrindori Davlat Bobonovning so‘zlariga ko‘ra, sport nafaqat koronavirus, balki barcha kasalliklarning oldini olishda muhim o‘rni tutadi.
— Aslida sport bilan muntazam shug‘ullanadigan har qanday odamning immuniteti yuqori bo‘ladi. Virusni yuqtirgan taqdirda ham yengil o‘tadi. Shunga qaramay, bugungi kunda kishilar gavjum joylarga bormayman. Antiseptik vositalardan muntazam foydalanaman. Ishonchim komil, shunday qilsak ko‘rinmas yovdan nafaqat o‘zimizni, balki yaqinlarimizni ham asragan bo‘lamiz. Pandemiya tufayli qanchadan-qancha odamlar olamdan o‘tayotganini ko‘ryapmiz. Turli ko‘ngilsizliklarning oldini olish va salomatligim doimo joyida bo‘lishi uchun yaqinda “Sputnik-V” vaksinasi bilan to‘liq emlandim. O‘zimni juda yaxshi his qilyapman. Tanamda hech qanday og‘riq yoki noxush holatni sezmadim. Oldin qanday bo‘lsam, shundayman.
Boks bo‘yicha “Rio-2016” Olimpiada o‘yinlari chempioni Shahobiddin Zoirov ham “Sputnik-V” vaksinasi bilan emlangan. U bilan suhbatlashar ekanmiz, “Men koronavirusdan to‘liq himoyalanganman”, — deya taʼkidladi.
— Ayni paytda tog‘dagi sport bazamizda navbatdagi musobaqalarga tayyorgarlik ko‘ryapmiz. Shunday bo‘lsa-da, bu yerda ham jamoamiz shifokorlari bizni muntazam ravishda ko‘rikdan o‘tkazib turibdi. Bo‘sh paytimizda ko‘chaga chiqishimizga ham cheklov o‘rnatilgan. Buni to‘g‘ri tushunamiz. Chunki o‘zimizni virusdan qancha himoya qilsak, ehtiyot chorasini ko‘rsak, oldinda turgan musobaqalarda ishtirok etishimizda hech qanday muammo bo‘lmaydi. Barchani vaksinatsiyadan o‘tishga va salomatliklariga befarq bo‘lmaslikka chaqiraman.
Afsuski, virusni ko‘z bilan ko‘rib, qo‘l bilan ushlab bo‘lmaydi. “Biologik urush” deya taʼriflanayotgan bu baloga qarshi kurashda hamma “marjon” kabi tizilishi lozim.
Tokio-2020 Olimpiada o‘yinlarida og‘ir atletika bo‘yicha rekord o‘rnatgan Muattar Nabiyeva “virus kishining jismoniy holatini inobatga olmaydi”, degan fikrda.
— Yaponlarda niqob taqib yurish azaldan odatga aylangan ekan. Shunday bo‘lishiga qaramay, Tokioda bo‘lganimizda u yerda ham koronavirus keng tarqalgani, undan himoyalanish uchun keskin chora-tadbirlar, cheklovlar joriy etilganiga guvoh bo‘ldik. Fikrimcha, sport bilan doimiy shug‘ullanish ham bu baloga qarshi kurashishda muhim vosita bo‘lishi mumkin.
P.S.: Muattar ham hozirda virusga qarshi “Sputnik-V” vaksinasi bilan emlangan.
Jamshidbek Amirov
