Polsha migrantlar soni oshayotganiga Minskni ayblashda davom etmoqda
Polsha chegara xizmati kamida 10 ming kishining Yevropa Ittifoqiga kirmoqchi bo‘layotganini maʼlum qildi. Jumladan, 4 sentyabr kuni 215, 5 sentyabr kuni 152 kishining noqonuniy kirib kelishi oldi olingan.
Polsha chegara xizmati rahbari general Toma Praga fikricha, qochoqlarning mamlakat sarhadlarini noqonuniy kesib o‘tilishida migrantlarni Osiyo va Afrikadan Yevropaga kiritish bilan shug‘ullanadigan xalqaro guruhlar ishtirok etgan. DW nashriga ko‘ra, migrantlarning aksariyati Polshaga kelishini bilmagan.
Varshava bu kabi harakatlarda Belarusni ayblamoqda. General Praganing qayd etishicha, Belarus Prezidenti Aleksandr Lukashenko migrantlarni olib kelgan va qisqa muddatdan so‘ng Litva, Latviya va Polsha chegarasiga chiqarib yuborgan. Hozirda bu uch davlat Belarus bilan tutash hududlarda favqulodda vaziyat joriy etgan.
2021 yil may oyida Lukashenkoga qarshi sanksiyalar kuchaytirilgandan so‘ng Belarus rahbari migrantlarning YEIga o‘tib ketishiga to‘sqinlik qilmasligini maʼlum qilgan edi.
Bundan avval Minsk Polshani migrantlarni chegaradan siqib chiqarishda ayblagan edi.
Jahongir Qo‘ziyev
