“Donald Trampning navbatdagi prezidentlik saylovida qatnashishiga ishonchi komil” — Jeyson Miller
Amerikaning sobiq yetakchisi respublikachi Donald Tramp 2024 yilda bo‘ladigan navbatdagi prezidentlik poygasida ishtirok etadi va buni eʼlon qilish uchun qulay vaqtni kutmoqda. Bu haqda “Politico” gazetasi Trampga yaqin manbalar, shuningdek, AQSH Respublikachilar partiyasi aʼzolari maʼlumotlariga tayanib xabar tarqatgan.
Gazetada yozilishicha, sobiq prezident ommaviy axborot vositalarida o‘z ishtirokini sezilarli darajada oshirdi va uning shtab-kvartirasi mablag‘ yig‘ishni kuchaytirdi. Bundan tashqari demokratlarning amaldagi Prezidenti Jo Baydenga qarshi hujum va siyosiy reklamalar hajmi yana-da ko‘paydi.
Nashr manbalariga ko‘ra, koronavirus tarqalishi bilan bog‘liq vaziyatning yomonlashishi hamda Afg‘onistonda sodir bo‘lgan voqealar fonida Bayden reytingining pasayishi Trampning saylovda qatnashishga bo‘lgan qiziqishini kuchaytirdi.
Trampning sobiq maslahatchisi va matbuot kotibi Jeyson Miller sobiq prezidentning saylovlarda qatnashishiga ishonchi komil ekanini bildirdi.
Nasiba To‘xtayeva
