Rossiyaning Xabarovsk o‘lkasida g‘oyib bo‘lgan samolyot topildi
Hodisa ro‘y bergan joyga borilganda, ekipaj aʼzolarining hammasi halok bo‘lgani aniqlandi.
Rossiyaning Xabarovsk o‘lkasida 22-sentyabr kuni g‘oyib bo‘lgan An-26 samolyoti bo‘laklari Korfovskiy qishlog‘i yaqinidagi tog‘ etagida joylashgan Bolshexexsirskiy qo‘riqxonasidan topildi.
Voqeaga Rossiya Tergov qo‘mitasi veb-saytida quyidagicha izoh berildi:
“2021-yil 23-sentabr kuni mahalliy vaqt bilan 12:00 da Bolshexexsirskiy davlat qo‘riqxonasi tizmasining tepasida qidiruv ishlari olib borilayotgan vaqtda halokatga uchragani taxmin qilinayotgan An-26 samolyotining bo‘laklari topildi”.
Halokat joyi Favqulodda vaziyatlar vazirligining vertolyoti yordamida aniqlangan. Samolyot noqulay joyga qulab tushgani tufayli qutqaruvchilar u yerga qiyinchilik bilan yetib borgan.
Hodisa ro‘y bergan joyga borilganda, ekipaj aʼzolarining hammasi halok bo‘lgani aniqlandi.
“Moskva vaqti bilan 10:55 da birinchi qidiruv guruhi An-26 halokatga uchragan joyga yetib bordi. Ekipajning barcha aʼzolari halok bo‘lgan, ularning jasadi topildi”, — deya xabar qildi "RIA Novost".
An-26 samolyoti kechqurun radarlardan g‘oyib bo‘ldi va Xabarovskdan 40 kilometr uzoqlikda u bilan aloqa uzildi. “Parvoz tekshiruvlari va tizimlari” kompaniyasiga tegishli samolyot Xabarovsk o‘lkasida aloqa vositalari va radiolokatsiya uskunalarini tekshirish bilan shug‘ullanayotgan edi. Samolyot bortida 6 kishi bo‘lgan.
Halokatning dastlabki sabablari yomon ob-havo sharoiti yoki uchuvchilarning xatosi deb baholanmoqda. Tergov qo‘mitasi hodisa yuzasidan jinoiy ish ochdi.
Eslatib o‘tamiz, bundan avval Hindiston havo kuchlarining Mig – 21 samolyoti Panjob shtatiga qulab tushgandi.
Cho‘lponoy Ahmedova
