Janubiy Koreya kinoijodkori Andijonda film suratga oladi
Avval xabar qilinganidek, shu yilning 28-sentyabr — 3-oktyabr kunlari yurtimizda “Buyuk ipak yo‘li durdonasi” XIII Toshkent xalqaro kinofestivali bo‘lib o‘tadi.
Festival doirasida “Kino — 5 kunda” tanlovi eʼlon qilingan bo‘lib, mazkur loyihada turli davlatlardan kelgan mahoratli kinoijodkorlar qatnashmoqda. Tanlov ishtirokchilaridan 5 kun ichida “Buyuk ipak yo‘li” mavzusida qisqa metrajli film suratga olish talab etiladi. Tanlovda birinchi o‘rinni egallagan ishtirokchiga 15 ming, ikkinchi o‘ringa 10 ming, uchinchi o‘ringa esa 7 ming AQSH dollari miqdorida mukofot belgilangan.
Janubiy Koreya kinoijodkori Pak Su Min tanlovda “Mening 90 yoshli otam” filmi bilan qatnashadi. Ijodiy jamoa ayni paytda Andijon viloyatiga jo‘nab ketdi. Ular, dastavval, suratga olish obyektlarini ko‘zdan kechiradi. Film ota va o‘g‘ilning o‘zaro munosabatlari, hayotiy haqiqatlari, o‘tmishdagi kechinmalari haqida.
Eslatib o‘tamiz, Janubiy Koreya kinoijodkorlari suratga olgan ko‘plab filmlar o‘zbek tomoshabinlariga yaxshi tanish. Ularning aksariyati o‘zbek tiliga tarjima qilingan. “Qish sonatasi”, “Vorislar”, “Saroy javohiri”, “Musavvir” kabi seriallar, shular jumlasidan.
Ayni paytda 28-sentyabr — 3-oktyabr kunlari o‘tkaziladigan “Ipak yo‘li durdonasi” XIII Toshkent xalqaro kinofestivaliga qizg‘in tayyorgarlik ko‘rilmoqda.
Bundan avval “Kino — 5 kunda” tanlovida filmlar qaysi nominatsiyalar bo‘yicha taqdirlanishi va g‘oliblarga taqdim etiladigan mukofotlar haqida xabar berilgandi.
Maftuna Rejabboyeva tayyorladi.
