Budapeshtdan O‘zbekiston shaharlariga parvozlar yo‘lga qo‘yilishi rejalashtirmoqda
Xiva shahrida "Markaziy Osiyo jahon sivilizatsiyalari chorrahasida" xalqaro madaniy forumi doirasida o‘tkazilgan Turksoy davlatlari Madaniyat vazirlari Doimiy Kengashining 38-yig‘ilishi doirasida O‘zbekiston bosh vaziri o‘rinbosari Aziz Abduhakimovning Vengriya tashqi iqtisodiy aloqalar va tashqi ishlar vaziri Peter Siyarto bilan uchrashdi.
Turizm va sport vazirligi axborot xizmatining qayd etishicha, uchrashuvda sayyohlar almashinuvini qayta tiklash hamda O‘zbekiston va Vengriya o‘rtasida sayyohlar oqimini sezilarli darajada oshirish bo‘yicha chora-tadbirlarni qabul qilish asosiy masalalaridan biri bo‘ldi. Shu munosabat bilan tomonlar “WizzAir” aviakompaniyasi tomonidan "Budapesht – Samarqand" to‘g‘ridan-to‘g‘ri reyslarini yo‘lga qo‘yish masalasi ham muhokama qilindi.
Vengriya tashqi ishlar vaziri Budapeshtdan O‘zbekistonning Samarqand, Toshkent va Buxoro kabi yirik shaharlariga to‘g‘ridan-to‘g‘ri reyslar amalga oshirilishiga qiziqish bildirdi. Shu bilan birga, O‘zbekiston aeroportlarida xizmat ko‘rsatish shartlarini taʼminlashda va aviaqatnovlarga oid bitim imzolanishida ko‘makka umid bildirdi.
O‘zbekiston tomoni yaqin vaqt ichida Vengriya aviatashuvchisiga ushbu reysni ishga tushirish uchun eng qulay shart-sharoitlarni yaratish va uni har tomonlama qo‘llab-quvvatlashga tayyorligini tasdiqladi.
Maʼlumot uchun, ikki mamlakatning ilm-fan sohasi vakillari va tadqiqotchilari o‘rtasida ham yaqin hamkorlik aloqalari yo‘lga qo‘yilgan. Masalan, Loranda Eotvosh nomidagi Budapesht universiteti professori, Sharqshunoslik instituti direktori Benedek Perri bilan birgalikda Vengriya Fanlar Akademiyasi kutubxonasida saqlanayotgan O‘zbekiston madaniy merosini o‘rganish loyihasi amalga oshirilmoqda.
Hozirda Peri F. Navoiyning "Mahbub-ul qulub" asarini ingliz tiliga, “Boburnoma” asarini esa venger tiliga tarjima qilmoqda.
Avvalroq Turizm va sport vaziri Aziz Abduhakimov Tokioda Yaponiyaning madaniyat masalalari bo‘yicha vakili Sunʼichi Tokura bilan uchrashgani haqida xabar berilgandi.
