Moskva viloyatida “Nurchilar” ekstremistik tashkiloti faoliyatiga chek qo‘yildi
Rossiya huquqni muhofaza qiluvchi organlari Moskva viloyatida “Nurchilar” ekstremistik tashkiloti faoliyatiga chek qo‘ydi. Bu haqda Rossiya IIV maʼlumotlariga tayanib “TASS” xabar berdi.
“Moskva viloyati hududida “Nurchilar” ekstremistik tashkilotining yashirin boshlang‘ich bo‘lagining boshqaruv markazi faoliyatiga chek qo‘yildi. Qo‘lga kiritilgan maʼlumotlarga ko‘ra, ushbu tashkilot rahbariyati Rossiyada ko‘p tarmoqli tizimni yo‘lga qo‘yishga harakat qilgan. Shu maqsadda ular yangi aʼzolarni jalb qilgan. Unga aʼzo bo‘lganlarning aksariyati Moskva shahridagi talabalardan iborat bo‘lgan”, – deyiladi RF ichki ishlar vazirligi xabarida.
Talabalar chet elda tayyorgarlikdan o‘tish maqsadida tanlab olingan. Rossiya Ichki ishlar vazirligi va Federal xavfsizlik xizmati vakillarining qo‘shma tadbiri davomida “Nurchilar” mafkurasi targ‘ib qilingan 250 ta material topilgan.
Rossiya Tergov Qo‘mitasining Moskva bo‘linmasining maʼlum qilishicha, holat bo‘yicha RF Jinoyat kodeksining 282.2 moddasi bo‘yicha jinoyat ishi qo‘zg‘atilgan.
Bundan avval Toshkent viloyatida ekstremistik faoliyat bilan shug‘ullanib kelgan 27 kishi qo‘lga olingani hamda Moskvada “Xizb ut-tahrir” aʼzolari faoliyatiga chek qo‘yilgani xabar qilingandi.
