Тошкент вилоятида экстремистик фаолият билан шуғулланиб келган 27 киши қўлга олинди
Тошкент вилоятида «Хавфсиз ҳудуд» тезкор-профилактик тадбири давомида яширин равишда экстремистик фаолият билан шуғулланиб келган бир гуруҳ шахслар қўлга олинди. Бу ҳақда вилоят ИИББ матбуот хизмати хабар бермоқда.
Маълум бўлишича, Тошкент вилоят ИИББ, прокуратура, ДХХ билан ҳамкорликда Нурафшон шаҳри, Оҳангарон ва Чиноз туманларида ўтказган «тезкор тадбир» давомида шундай шахсларниниг 27 нафари аниқланиб, ушланган.
Таъкидланишича, ҳозирда ушбу шахсларнинг хатти-ҳаракатларига қонуний баҳо бериш бўйича суриштирув ишлари олиб борилмоқда.
Аввалроқ Тошкентда “Халифалик” давлатини қурмоқчи бўлган 12 нафар шахс, Тошкент вилоятнинг Зангиота туманида экстремистик фаолият билан шуғулланиб келаётган яна бир гуруҳ ушлангани, шунингдек, Жиззах вилоятида Ҳизб ут-Таҳрир ал-Исломи халқаро террорчилик гуруҳи вакиллари ҳам қўлга олингани ҳамда Қўқонда «Жиҳодчилар» оқими тарафдорлари фаолиятига чек қўйилгани тўғрисида хабар берилганди.
