Sambochilarimiz Tataristondan uchta medal bilan qaytdi
Rossiya Federatsiyasining Qozon shahrida o‘tkazilgan sambo bo‘yicha “Tatariston Respublikasi Prezidenti kubogi” xalqaro turnirida sambochilarimiz uchta medalni qo‘lga kiritib, yurtimizga qaytib keldi.
To‘rtinchi marotaba tashkil etilgan mazkur musobaqada dunyoning 15 ta mamlakatidan 207 nafar sportchi medallar uchun kurash olib bordi. Quvonarlisi, xalqaro turnir yakuniga ko‘ra, uch nafar sambochimiz sovrindorlar safidan joy oldi.
Musobaqada -79 kg vazn toifasida yurtimiz sharafini himoya qilgan Firdavs Xojimamatov finalgacha yetib bordi va kumush medal sohibi bo‘ldi. -98 kg vaznli sambochimiz Neʼmat Yoqubov ham turnirning kumush medalini qo‘lga kiritdi. Jangovar sambo bahslarida esa -71 kg vazn toifasida qatnashgan yana bir hamyurtimiz Sanʼat Ismanov jamoamizga bronza medalini taqdim etdi.
Avvalroq dzyudo bo‘yicha sportchilarimiz 5 ta medalni qo‘lga kiritgani va bokschi qizlarimiz Bolgariyadagi xalqaro turnirga yo‘l olgani haqida xabar berilgandi.
Jamshidbek Amirov
