Ijtimoiy tarmoqlarga shaxsiy maʼlumotlarni qo‘yishda ehtiyot bo‘ling — IIV
So‘nggi vaqtlarda Telegram ijtimoiy tarmog‘ida tovlamachilik yo‘li orqali daromad orttirish maqsadida ayrim shaxslar ijtimoiy muhandislik uslubi bilan fuqarolarning shaxsiy hayotiga oid maʼlumotlarni (fotosurati, ismi, sharifi, telefoni, manzili va boshqalar) to‘plab, keyinchalik ularni shaʼni va obro‘siga putur yetkazuvchi “post”lar ko‘rinishida ijtimoiy tarmoqlarda tarqatmoqda.
So'ngra bu maʼlumotlarni tarqatmaslik evaziga pul mablag‘larini talab qilayotganligi kuzatilmoqda.
Hozirda bunday kanallardan bir nechtasi aniqlangan hamda ularni yurituvchilar xorij davlatlaridan turib faoliyat ko‘rsatishadi.
Ichki ishlar vazirligi tomonidan ushbu va boshqa turdagi jinoiy faoliyat bilan shug‘ullanuvchi barcha kanallarning egalari elektron manzillari aniqlanib, o‘rnatilgan tartibda tergovga qadar tekshiruvlar o‘tkazilmoqda.
Tekshiruv yakunlari natijasida tovlamachilik qilayotgan shaxslarga nisbatan qonuniy chora ko‘riladi.
Ammo hozirgi kunda mazkur jinoiy kanallarni bloklashning texnik imkoniyatlari mavjud emas. Shuning uchun kanallar nomi oshkor etilmaydi.
Avvalroq, Facebook‘da Shavkat Mirziyoyev nomi bilan soxta akkaunt ochib firibgarlik qilgan hamda Peshku tumanida ijtimoiy tarmoq orqali o'girlik qilgan shaxs qo'lga olingani haqida xabar berilgandi.
Cho‘lponoy Ahmedova
