Kongoda kema halokatga uchradi
Kongoda qo‘lbola yasalgan kema daryoda halokatga uchradi. Buning oqibatida 51 kishi halok bo‘ldi, 69 kishi bedarak yo‘qolgan. Bu haqda France 24 telekanali maʼlum qildi.
Kongo Demokratik Respublikasi Mongala provinsiyasi gubernatori matbuot kotibi Nestor Magbadoning so‘zlariga ko‘ra, yo‘qolganlar soni qayiqning sig‘imiga qarab baholangan. Kema bir-biriga bog‘lab qo‘yilgan to‘qqizta yog‘och kanolardan iborat edi.
Magbadoning aytishicha, 39 kishi tirik qolgan. Qidiruv va qutqaruv ishlari davom etmoqda.
Falokat sababi tunda ob-havoning yomonlashgani bo‘lishi mumkin. Viloyat hokimiyati uch kunlik motam eʼlon qildi.
Bir necha kun oldin Kongoda 11 kishi Tanganyika ko‘lida qayiq ag‘darilishi oqibatida cho‘kib ketgan edi. 62 kishi qirg‘oqqa chiqishga muvaffaq bo‘lgan.
Bundan avval Tataristonda samolyot qulashi oqibatida 16 kishi halok bo‘lgani to‘g‘risida xabar qilingan edi.
