"The Korea Herald" gazetasi O‘zbekistondagi muhim tadbirlarni o‘z sahifalarida keng yoritadi
O‘zbekistonning Janubiy Koreyadagi elchisi Vitaliy Fen O‘zbekiston Prezidenti saylovi jarayonini xorijda keng yoritishga yo‘naltirilgan faoliyat doirasida "The Korea Herald" gazetasi prezidenti Choy Jin Yong bilan uchrashdi. Bu haqda “Dunyo” AA xabar bermoqda.
Taʼkidlanishicha, muloqot chog‘ida o‘zaro hamkorlikni faollashtirishga, joriy yil yurtimizda bo‘lib o‘tadigan muhim tadbirlarni, shu jumladan, Prezident saylovini o‘tkazish jarayoni bilan bog‘liq matbuot xabarlarini ushbu nufuzli gazetaning sahifalarida yoritib borishga kelishib olindi.
Choy Jin Yongning qayd etishicha, so‘nggi yillarda O‘zbekiston o‘zining mintaqadagi hamda xalqaro miqyosdagi o‘rnini tobora mustahkamlamoqda.
"Mamlakatingizda ro‘y berayotgan o‘zgarishlarning asosiy mohiyati “inson manfaatlari hamma narsadan ustun”, degan tamoyil bilan izohlanadi. Eng eʼtiborli tomoni, Prezident Shavkat Mirziyoyev yoshlarning ilm o‘rganishi, xorijiy tillarni mukammal egallashi, buning uchun zarur sharoitlarni yaratishga nihoyatda jiddiy masala sifatida qaramoqda. Darhaqiqat, dunyo shitob bilan o‘zgarayotgan, barqarorlikka yangidan-yangi xavf-xatar hamda tahdidlar paydo bo‘layotgan hozirgi sharoitda ilm-maʼrifat masalasi o‘z dolzarbligini namoyon etmoqda. Aynan ana shu yo‘nalish xalqlar farovonligining kaliti bo‘lib, u insoniyatni tinchlik, ezgulik va bag‘rikenglikka yetaklaydi", — dedi Choy Jin Yong.
Muloqot davomida istiqbolda samarali aloqalarni rivojlantirish maqsadida "The Korea Herald" gazetasi bilan elchixona o‘rtasida hamkorlik memorandumi imzolandi.
Eslatib o‘tamiz, O‘mon Sultonligining "Asdaa Oman" gazetasida "Saylovoldi tayyorgarlik ishlari yakunlangach, 24-oktabr kuni O‘zbekistonda Prezident saylovlari o‘tkaziladi" sarlavhali maqola chop etilgandi.
Avvalroq saylov byulletenining shakli va matni tasdiqlangani, Prezident saylovi jarayonlariga Ichki ishlar vazirligi va Milliy gvardiya xodimlari jalb etilgani, saylov byulletenlarini Brayl alifbosida tayyorlash taklif qilingani, MSK raisi o‘rinbosari Bahrom Qo‘chqorov prezident saylovlarida qatnashadigan nomzodlarga nisbatan qonunchilikda belgilangan talablarda o‘zgarish yo‘qligi xabar qilingandi. Bundan tashqari, O‘zbekistonda koronavirusdan davolanayotganlar prezident saylovida qanday ishtirok etishi hamda Qoraqalpog‘iston Respublikasi, viloyatlar va Toshkent shahri hududlarida O‘zbekiston Respublikasi Prezidenti saylovini o‘tkazish uchun 14 ta saylov okrugi tuzish to‘g‘risida qaror qabul qilingani haqida xabar berilgandi.
