Toshkent — Shahrisabz — Toshkent yo‘lovchi poyezdining harakat jadvali o‘zgaradi
Joriy yil 20-21 oktabr kunlaridan boshlab Toshkent — Shahrisabz — Toshkent yo‘lovchi poyezdining harakat jadvali o‘zgaradi. Bu haqda “O‘ztemiryo‘lyo‘lovchi” AJ xabar bermoqda.
Qayd etilishicha, yo‘lovchilar talablarini inobatga olib, ularga yana-da ko‘proq transport xizmatlarini ko‘rsatish maqsadida 2021-yil 20-21 oktabr kunlaridan boshlab, Toshkent — Shahrisabz — Toshkent yo‘nalishida harakatlanadigan 4/3 sonli yo‘lovchi poyezdining harakat jadvaliga o‘zgartirish kiritiladi.
Hozirgi kunda Toshkent markaziy temir yo‘l vokzalidan harakatlanayotgan 4-sonli Toshkent — Shahrisabz yo‘lovchi poyezdi joriy yil 20-oktabrdan boshlab yangi jadval asosida soat 18:50 da jo‘naydi. Shuningdek, joriy yil 21-oktabrdan Shahrisabz — Toshkent yo‘nalishida harakatlanayotgan 3-son yo‘lovchi poyezdi soat 05:31 da Shahrisabz temir yo‘l vokzalidan qatnay boshlaydi.
Maʼlumot uchun: hozirda 4-sonli Toshkent — Shahrisabz yo‘lovchi poyezdi Toshkent markaziy temir yo‘l vokzalidan soat 09:00 da, Shahrisabz — Toshkent yo‘nalishida harakatlanayotgan 3-son yo‘lovchi poyezdi Shahrisabz temir yo‘l vokzalidan soat 17:04 da jo‘namoqda.
Avvalroq Toshkent — Samarqand — Toshkent yo‘nalishida “Afrosiyob” poyezdining qo‘shimcha qatnovi yo‘lga qo‘yilgani, Ispaniyadan yuborilgan “Afrosiyob” tezyurar poyezdi Toshkentga yetib kelgani, Toshkent — Urganch — Toshkent yo‘nalishida qo‘shimcha poyezdlar qatnovi yo‘lga qo‘yilgani hamda Andijon — Termiz — Andijon yo‘nalishida yangi yo‘lovchi poyezdi qatnovi ishga tushgani haqida xabar berilgandi.
