«Ўзбекистон темир йўллари» АЖ ахборот хизмати хабар беришича, Испаниянинг «Талго» компанияси томонидан ишлаб чиқарилган «Aфросиёб» тезюрар поезди Билбао шаҳридан махсус юк кемасида юборилган.
Поездлар 4000 км масофани босиб ўтиб, Россиянинг Санкт-Петербург шаҳрига етказилгач, у ерда ҳаракат таркибининг барча вагон ва локомотивлари йиғилиб, яхлит ҳолатга келтирилган ва 20 июл куни темир йўл орқали Ўзбекистонга жўнатилган.
Янги поезд ва вагонлар 24 июл куни кечки пайт Тошкентга етиб келди.
Бунга қадар Ўзбекистонга «Талго» компанияси томонидан ишлаб чиқарилган тезюрар поездлардан тўртта олиб келинган бўлса, бугунги таркиб бешинчиси бўлди. «Ўзбекистон темир йўллари» АЖ жорий йил якунига қадар яна битта шу турдаги юқори тезликда ҳаракатланувчи поезд келтирилишини маълум қилмоқда.