O‘zbekiston Prezidenti saylovi — Saudiya Arabistoni gazetasi nigohida
Saudiya Arabistonining yetakchi nashrlaridan biri bo‘lgan "Al-Muashshir al-Iqtisadiy" gazetasida "O‘zbekiston 24-oktabr kuni bo‘lib o‘tadigan Prezident sayloviga tayyorgarlik ko‘rmoqda" nomli maqola chop etildi.
“Dunyo” axborot agentligi xabariga ko‘ra, maqolada O‘zbekiston Prezidenti sayloviga ko‘rilayotgan tayyorgarlik ishlari, saylov jarayonining milliy saylov qonunchiligi, tan olingan xalqaro standartlar va demokratik tamoyillarga muvofiq, ochiq va oshkora o‘tkazilishi bo‘yicha amalga oshirilayotgan ishlar haqida so‘z boradi.
Maqolada xorijiy davlatlarda bo‘lib turgan fuqarolarning O‘zbekiston Prezidenti saylovida ishtirokini taʼminlash bo‘yicha bajarilayotgan ishlarga ham alohida eʼtibor qaratilgan.
"O‘zbekiston diplomatiya vakolatxonalari joylashgan 38 mamlakatda 54 ta saylov uchastkasi tashkil etilgan. Shuningdek, 128 ta shaharda va diplomatiya vakolatxonasi bo‘lmagan 11 ta davlatda 310 dan ortiq ovoz berish nuqtalari o‘rin olgan", — deyiladi maqolada.
Eslatib o‘tamiz, O‘mon Sultonligining "Asdaa Oman" gazetasida "Saylovoldi tayyorgarlik ishlari yakunlangach, 24 oktyabr kuni O‘zbekistonda Prezident saylovlari o‘tkaziladi" sarlavhali maqola chop etilgandi.
Avvalroq Hindistondagi “Political Events” jurnali sahifasida “Yangi O‘zbekiston zamonaviy tashqi siyosatining xalqaro-huquqiy asoslari mustahkamlanmoqda” sarlavhali maqola bosilib chiqqani hamda “Yangi O‘zbekiston” bog‘i va Mustaqillik monumentining tantanali ochilishi Janubiy Koreyaning "The Korea Post" jurnali sahifalarida chop etilgani haqida xabar berilgandi.
