O‘zbekistonning Turkiyadagi elchixonasi huzurida tashkil etilgan 43-saylov uchastkasida ovoz berish jarayoni davom etmoqda
Turkiyada vaqtincha bo‘lib turgan va istiqomat qilayotgan O‘zbekiston fuqarolari saylov jarayonida faol ishtirok etib, o‘zlarining tanlovlarini amalga oshirmoqda.
Bugun yurtimizning Turkiyadagi elchixonasi huzurida tashkil etilgan 43-saylov uchastkasida O‘zbekiston Prezidenti saylovida ovoz berish jarayoni ko‘tarinki ruhda o‘tmoqda.
“Dunyo” axborot agentligi xabariga ko‘ra, saylov uchastkasida saylov jarayonlari mahalliy vaqt bilan soat 8:00 da davlat madhiyasi sadolari ostida ochildi.
Qayd etilishicha, ovoz berish jarayoni O‘zbekiston Konstitutsiyasi, yangi qabul qilingan Saylov kodeksi, milliy saylov qonunchiligiga kiritilgan o‘zgartishlar hamda qabul qilingan talablarga rioya etilgan holda o‘tkazilmoqda.
"O‘zbekistonning Anqaradagi elchixonasi huzuridagi tuzilgan saylov uchastkasida ovoz berish uchun barcha sharoit yaratilganligiga yana bir bor guvoh bo‘ldim. Prezidentlikka nomzodlar to‘g‘risidagi maʼlumotlar va ularning saylovoldi dasturlari bilan tanishib, fuqarolik burchimni ado etgan holda munosib nomzodga ovoz berdim", — deydi Turkiyada mehnat faoliyatini olib borayotgan vatandoshimiz Zumrad Ostanqulova.
Maʼlumot uchun: Turkiyada vaqtincha bo‘lib turgan va istiqomat qilayotgan O‘zbekiston fuqarolari saylov jarayonida faol ishtirok etib, o‘zlarining tanlovlarini amalga oshirmoqda.
Eslatib o‘tamiz, YEXHT parlamentlar assambleyasi kuzatuvchilari O‘zbekiston Prezidenti sayloviga yuqori baho bergandi. Shu bilan birga, kuzatuvchilardan biri afg‘onistonlik Nuri Husayn Ali, Tojikistonlik kuzatuvchi hamda Pokiston mamlakati kuzatuvchisi Tezeen Akhtar O‘zbekiston Prezidenti saylovi borasidagi fikrlari bilan bo‘lishgandi.
Bundan avval Markaziy saylov komissiyasi soat 11:00 ga qadar ovoz bergan saylovchilar ko‘rsatkichini eʼlon qilgani, saylovi jarayonlarini yoritish uchun qanday hujjat talab qilinishi, saylovchilarning umumiy soni 21,2 million nafardan oshgani, O‘zbekiston Respublikasi Prezidenti saylovida saylovchilar uchun eslatma hamda Prezident saylovini o‘tkazish bo‘yicha 10 mingdan ortiq saylov uchastkasi tuzilgani haqida xabar berilgandi.
