Xitoy yaqin yillar ichida harbiy qudrat bo‘yicha AQSH va Rossiyani ortda qoldirishi mumkin — Jon Xayten
Bunga nima sabab bo‘lishi aytildi.
Xitoy yaqin yillar ichida harbiy qudrat bo‘yicha AQSH va Rossiyani ortda qoldirishi mumkin. Bu haqda AQSH qurolli kuchlari shtab boshlig‘i o‘rinbosari Jon Xayten maʼlum qilgan.
Xaytenga Vashington harbiy analitiklar guruhi bilan uchrashuv vaqtida Rossiya emas, balki Xitoyning harbiy salohiyati o‘sishi AQSH uchun asosiy tahdidmi, degan savol bilan murojaat qilishgan.
“Rossiya hamon muqarrar tahdid hisoblanadi. Chunki u 1550 yadro zaryadiga ega. Xitoy esa bu raqamlarning atigi 20 foiziga egalik qiladi”, – degan Xayten.
Uning fikricha, Rossiya haqida yaqin istiqbolda xavotirlanish kerak. “Ammo bo‘lajak xavf – bu Xitoy. Chunki Xitoyning harbiy qurilishdagi o‘sishi – aqlbovar qilmas darajada. Ularning armiyasi turgan nuqtaga qarasak, AQSH va Rossiyadan o‘zib ketishi mumkin”, – deya qo‘shimcha qildi general.
Shuningdek, Xaytenning fikricha, agar AQSH ittifoqchilarsiz harakat qilsa, besh yildan keyin muammoli vaziyat bo‘ladi. General bu bilan nimani nazarda tutganiga aniqlik kiritmagan.
Bundan avval Jozef Bayden Xitoy bilan sovuq urushni istamasligini aytgandi. Shuningdek, Xitoy yangi gipertovushli qurol sinovini o‘tkazgani xabar qilingandi.
Jahongir Qo'ziyev
