Oltin “qazib oluvchi” qo‘lga tushdi
U noqonuniy ishlari uchun avval ham javobgarlikka tortilgan.
Tarkibida oltin zarralari mavjud bo‘lgan tosh va qumlarni qonunga zid ravishda qazish bilan shug‘ullangan shaxs ushlandi. U aybini xaspo‘shlash uchun ichki ishlar xodimiga 300 AQSH dollari miqdorida pora taklif qilgan.
Noqonuniy ishlari uchun avval ham javobgarlikka tortilgan uchquduqlik fuqaro navbatdagi jinoyatga qo‘l urgan.
Uning bu qilmishlari Zarafshon shahar ichki ishlar bo‘limi jinoyat qidiruv bo‘limi hamda yo‘l harakati xavfsizligi xodimlari tomonidan o‘tkazilgan tezkor tadbir davomida fosh etildi.
Fuqaroga nisbatan JKning 211-moddasi tegishli bandlari bilan jinoyat ishi qo‘zg‘atildi. Hozirda dastlabki tergov ishlari olib borilmoqda.
Avvalroq, "Oltin vasvasasi" nomi bilan mashhur shahar yonib ketgani va Navoiyda oltin qazib olinishi mumkin bo‘lgan yer uchastkalari auksionga qo‘yilgani haqida xabar berilgandi.
Maftuna Rejabboyeva tayyorladi
