“Yangi O‘zbekiston massivlari” inson qadri uchun xizmat qiladi
Prezident Shavkat Mirziyoyev raisligida bo‘lib o‘tayotgan videoselektor yig‘ilishida “Yangi O‘zbekiston massivlari”ni barpo etish yuzasidan muhim vazifalar belgilab olinmoqda.
“Yangi O‘zbekiston massivlari” kompleks rivojlanish tamoyili asosida barpo etiladi. Bunda har bir massivga ajratiladigan yer uchastkalarida sanoat loyihalari, xizmat ko‘rsatish obyektlari va ijtimoiy infratuzilma bir vaqtda quriladi.
Demak, bu massivlar aholisi o‘z uyi yaqinida ishli bo‘lish, yaxshi daromad topib, farzandlarini zamonaviy taʼlim muassasalarida o‘qitib, hech kimdan kam qilmay voyaga yetkazishi mumkin.
Taʼkidlash joiz, “Yangi O‘zbekiston massivlari” mamlakatimizda “Inson qadri uchun” tamoyili asosida boshlanayotgan yangi, o‘z navbatida, muhim xalqchil loyiha hisoblanadi.
Maʼlumot uchun: O‘zbekistonda har yili 300 mingga yaqin nikoh qayd etilmoqda. Mamlakatimiz nufusi esa kelgusi besh yilda 38 millionga yetishi prognoz qilingan.
Har bir hududda 3 tadan yangi massiv barpo etiladi
Bu haqda taʼkidlagan Prezident Shavkat Mirziyoyev tegishli vazirlik va idoralar masʼullari viloyat hokimlari bilan birga 1 oy muddatda har bir hududda kamida 3 tadan yer maydonini aniqlab, jami 40 ta uy-joy massivini barpo etish bo‘yicha tanlovlarni boshlash bo‘yicha topshiriq berdi.
– Bunda yerlar ochiq auksionga chiqariladi va qaysi tadbirkor uyning narxini arzon qilib berish majburiyatini olsa, unga afzalliklar beriladi, – dedi Shavkat Mirziyoyev.
2022 yil: yangi massivlardagi uylarning mingtasi ehtiyojmand oilalar va yolg‘iz ayollarga beriladi
Prezident Shavkat Mirziyov kelgusi yili “Yangi O‘zbekiston massivlari”da qurilayotgan uylarning 1 mingtasi ehtiyojmand oilalar va yolg‘iz ayollar uchun davlat tomonidan kafolatli sotib olinishi haqida maʼlum qildi.
Buning uchun 220 milliard so‘m mablag‘ qurilish tashkilotlariga oldindan o‘tkazib berilishi aytildi.
