O‘zbekiston Prezidentining inauguratsiya marosimi — Janubiy Koreya matbuoti nigohida
Yangi O‘zbekiston taraqqiyot strategiyasi ishlab chiqildi va saylov jarayonida u umumxalq muhokamasidan o‘tkazildi.
Janubiy Koreyaning nufuzli nashrlaridan biri - "The Korea Post‘ jurnalining rasmiy veb-sahifasida O‘zbekiston Respublikasi Prezidentining lavozimiga kirishgani haqida maqola eʼlon qilindi.
“Dunyo” axborot agentligi xabariga ko‘ra, maqolada 6 noyabr kuni Toshkentda Oliy Majlis Senati aʼzolari va Qonunchilik palatasi deputatlari, davlat va jamoat tashkilotlari rahbarlari, diplomatik korpus vakillari, mahalliy va xorijiy ommaviy axborot vositalari xodimlari ishtirok etgan tantanali marosimda Markaziy saylov komissiyasi raisi Shavkat Mirziyoyevga O‘zbekiston Respublikasi Prezidenti guvohnomasini topshirgani qayd etildi.
Taʼkidlanishicha, shuningdek inauguratsiya marosimida Prezident Shavkat Mirziyoyevning kelgusi besh yilga mo‘ljallangan ustuvor yo‘nalishlar haqidagi nutqining mazmun-mohiyati batafsil tahlil qilingan.
"Harakatlar strategiyasidan — Taraqqiyot strategiyasi sari" degan tamoyil asosiy g‘oya va bosh mezon sifatida kun tartibiga qo‘yildi, deb yozadi "The Korea Post".
Eslatib o‘tamiz, Omanda nashr etiladigan "Asdaa Oman" gazetasi bosh muharriri Ali al-Hasaniy O‘zbekiston Prezidenti etib saylangan Shavkat Mirziyoyevning lavozimga kirishishiga bag‘ishlangan tantanali marosim haqidagi fikrlari bilan o‘rtoqlashgandi.
Avvalroq Prezident Shavkat Mirziyoyevning BMT Bosh Assambleyasining 76-sessiyasidagi nutqi Janubiy Koreya matbuoti, Turkiyada nashr etiladigan “Yazar” gazetasi sahifasida “Har bir inson ko‘rishi kerak bo‘lgan mamlakat: Beruniy, Naqshbandiy, Buxoriy va Termiziyning diyori – O‘ZBEKISTON”, Hindistonning “Political Events” jurnali sahifasida “Yangi O‘zbekiston zamonaviy tashqi siyosatining xalqaro-huquqiy asoslari mustahkamlanmoqda” sarlavhali maqola hamda Saudiya Arabistonining yetakchi nashrlaridan biri bo‘lgan "Al-Muashshir al-Iqtisadiy" gazetasida "O‘zbekiston 24 oktyabr kuni bo‘lib o‘tadigan Prezident sayloviga tayyorgarlik ko‘rmoqda" nomli maqola chop etilgani haqida xabar berilgandi.
