Ilon Mask kompaniya aksiyalarining yangi qismini sotdi
Bu haqda meʼyoriy hujjatlarga tayanib, Interfaks xabar berdi.
Qayd etilishicha, Amerika elektromobil ishlab chiqaruvchisining 639 737 dona aksiyasi 1056,03 dollardan 1104,15 dollargacha bo‘lgan narxda sotilgan. Sotilgan aksiyalarning umumiy qiymati taxminan 687 million dollarni tashkil etdi.
Shu hafta boshida Ilon Mask 5 milliard dollarga yaqin aksiyalarni sotdi.
O‘tgan dam olish kunlari Mask agar “Twitter” foydalanuvchilari bunday harakat uchun ovoz berishsa, Tesla aksiyalarining 10 foizini sotishga vaʼda bergan edi. Ijtimoiy tarmoqda o‘tkazilgan so‘rov natijalariga ko‘ra, u ushbu paketni amalga oshirishi kerak edi.
Respondentlarning qariyb 58 foizi aksiyalarni sotish uchun ovoz bergan. Shundan so‘ng Mask vaʼdasida turib aksiyalarini sotgan edi.
Maʼlumot uchun: Tesla aksiyalari juma kungi dastlabki savdolar davomida 0,8 foizga arzonlashdi.
Eslatib o‘tamiz, “Forbes” nashri Ilon Maskni dunyodagi eng boy odam deb eʼlon qildi. Uning boyligi 271,3 milliard dollarga yetgan.
Avvalroq 2020 yilda Ilon Maskning qancha oylik maosh olgani, “Tesla” kompaniyasi robot-gumanoid ustida ishlayotganini maʼlum qilgani hamda dunyoni tirbandliklardan xalos etmoqchiligi haqida xabar berilgandi.
