Yevropa Ittifoqi o‘z tarixida ilk bor harbiy mashg‘ulotlar o‘tkazishi mumkin
Bu 2023 yilda amalga oshiriladi.
Yevropa Ittifoqi 2023 yilda o‘z tarixida ilk bor harbiy mashg‘ulotlar o‘tkazishi mumkin. Bu haqda El Pais gazetasi maʼlum qildi.
Gazeta qo‘lga kiritishga muvaffaq bo‘lgan maxfiy hujjatda Yevropa ittifoqining “o‘z dunyoqarashini ilgari surishi va manfaatlarini himoya qilishi uchun” zarur bo‘lgan qurolli kuchlarga egalik qilish zarurligi haqida so‘z boradi.
“2023 yildan boshlab biz doimiy harbiy, xususan, harbiy-dengiz mashg‘ulotlari o‘tkazamiz”, – deyiladi hujjatda.
Ushbu o‘quv mashg‘ulotlari Yevropa Shoshilinch chora ko‘rish kuchlari tuzilishiga yordam beradi. Bu kuchlar soni 2025 yilga kelib 5 mingni tashkil etishi mumkin. Shuningdek, hujjatda YEI davlatlari qurolli agressiya payti o‘zaro yordam berishini kuchaytirish maqsadida doimiy mashg‘ulotlar o‘tkazilishi davom ettiriladi. Qayd etilishicha, ushbu tashabbus Yevroittifoq davlatlari tashqi ishlar va mudofaa vazirlari yig‘ilishida muhokama qilinadi.
Yevropa Ittifoqi iqtisodiy integratsiyaga erisha olgan bo‘lsa-da, yagona Yevropa qurolli kuchlari masalasi hamon tuzilmay kelmoqda. Hozirda ittifoqqa aʼzo davlatlarning deyarli barchasi NATOga aʼzo va aynan ushbu alyans Yevropa xavfsizligida hal qiluvchi o‘ringa ega.
Avvalroq Yevropa Ittifoqining Ukrainada harbiy missiyasi ochilishi mumkinligi hamda NATO bosh kotibi Yens Stoltenberg Yevropa ittifoqi armiyasini tuzish maqsadga muvofiq emasligi haqida fikr bildirgani xabar qilingandi.
Jahongir Qo'ziyev
