AQShda o‘zbekistonlik fuqaro qo‘lga olindi: u “eng xavfli jinoyatchilar” qatoriga kiritildi
Ma’lumotlarga ko‘ra, u avval ham hujum va talonchilik bilan bog‘liq ayblovlar bo‘yicha sudlangan.
Oq uy AQShning Ogayo shtati, Chillikot shahrida 7-oktabr kuni Immigratsiya va bojxona nazorati (ICE) xodimlari tomonidan qo‘lga olingan O‘zbekiston fuqarosi Sardor Tirkashev haqida ma’lumot berdi.
Oq uyning ijtimoiy tarmoqdagi sahifasida Tirkashev boshqa hibsga olingan hujjatsiz muhojirlar bilan birga “Qo‘shma Shtatlardagi eng xavfli jinoyatchilar” qatorida tilga olingan.
Rasmiy ma’lumotga ko‘ra, Tirkashev avval og‘irlashtiruvchi holatlardagi ikki hujum va talonchilik bilan bog‘liq ayblovlar bo‘yicha sudlangan.
28-oktabr kuni AQSh Ichki xavfsizlik departamenti (DHS) Ogayo shtatida jinoiy tarixga ega, mamlakatda hujjatsiz yashayotgan muhojirlarning hibsga olingani haqida xabar berdi. Agentlik ular orasida jinsiy tajovuz, bo‘g‘ib o‘ldirish, mast holda avtomobil boshqarish va kokain savdosi bilan bog‘liq jinoyatlar uchun javobgarlikka tortilgan shaxslar borligini ma’lum qildi.
DHS direktori Markueyn Mullinning ta’kidlashicha, idora jinoiy tarixga ega hujjatsiz muhojirlarni hibsga olish va deportatsiya qilish ishlarini davom ettiradi.
Shu bilan birga, Slavyan Sakramento nashri Sardor Tirkashevning hibsga olingani haqida huquqni muhofaza qilish organlaridan ma’lumot topganini, biroq ICEdan bu holat yuzasidan bevosita tasdiq ololmaganini yozgan.
