Butun Ispaniya motamda: mamlakatda uch kunlik motam e'lon qildi

 

Ispaniya Bosh vaziri Pedro Sanches Toledo provinsiyasida ikki poyezd to‘qnashuvi oqibatida kamida 68 kishi halok bo‘lgani munosabati bilan mamlakatda uch kunlik milliy motam e’lon qildi. Bu haqda El Plural xabar berdi.

 

“Butun Ispaniya motamda”, — dedi hukumat rahbari.

 

Ispaniya transport vaziri Oskar Puente dastlabki ma’lumotlarga ko‘ra, hodisaga temir yo‘l signalizatsiya tizimidagi nosozlik sabab bo‘lganini bildirgan. Uning aytishicha, tizim poyezdlarga to‘xtash signalini bergan, biroq qisqa vaqt o‘tib, poyezdlardan biri harakatni davom ettirish signalini olgan.

 

Halokat 28-oktabr kuni soat 08:54 atrofida Toledo provinsiyasidagi Urda shahri yaqinida sodir bo‘lgan. Davlatga qarashli Renfe kompaniyasining AVE poyezdi va Iryo xususiy tashuvchisining poyezdi yuqori tezlikdagi temir yo‘l liniyasida to‘qnashgan.

 

Dastlabki ma’lumotlarga ko‘ra, Iryo poyezdi relslarda to‘xtab qolgan, uning ortidan kelayotgan Renfe poyezdi esa unga urilgan. To‘qnashuv oqibatida bir nechta vagon relsdan chiqib ketgan.

 

Ispaniyaning CSIF kasaba uyushmasi transport vaziri Oskar Puenteni isteʼfoga chiqishga chaqirdi. Uyushma vazirni masʼuliyatni o‘z zimmasiga olish o‘rniga, temir yo‘l xodimini aybdor qilib ko‘rsatishga urinayotganlikda tanqid qildi.

Oskar Puente hozircha isteʼfoga chiqish niyati yo‘qligini bildirgan. Uning aytishicha, birinchi navbatda halokat sabablarini aniqlash va voqeani to‘liq tekshirish kerak.

Bosh vazir Pedro Sanches agar beparvolik yoki qoidabuzarlik aniqlansa, qatʼiy choralar ko‘rilishini vaʼda qilgan.

 

Hodisa sabablari o‘rganilmoqda. Dastlabki taxminlar orasida signalizatsiya tizimidagi nosozlik va inson omili bor. Madrid va Andalusiya o‘rtasidagi tezyurar poyezdlar qatnovi to‘xtatilgan.