Yevropa Ittifoqi yoqilg‘i tanqisligiga tayyorlanmoqda: harbiy zaxiralardan foydalanilishi mumkin
Yevrokomissar inqiroz sharoitida yoqilg‘i ishlab chiqarishni tez oshirish va zarur zaxiralarni shakllantirish muhimligini ta’kidladi.
Yevropa Ittifoqi ehtimoliy harbiy mojaro sharoitida neftni qayta ishlash zavodlari faoliyatini ta’minlash va yoqilg‘i taqchilligining oldini olish uchun harbiy zaxiralardan foydalanish imkoniyatini ko‘rib chiqmoqda. Bu haqda Yevropa komissiyasining mudofaa va kosmos masalalari bo‘yicha komissari Andrius Kubilyus ma’lum qildi.
Uning so‘zlariga ko‘ra, Yevropa Ittifoqiga a’zo davlatlardan biriga hujum qilingan taqdirda, yoqilg‘ining katta zaxiralariga ehtiyoj tug‘ilishi mumkin. Harbiy zaxiralarning aniq hajmi esa oshkor etilmaydi.
Kubilyusning ta’kidlashicha, neftni qayta ishlash zavodlarini qo‘llab-quvvatlash yoqilg‘i narxlarini barqarorlashtirish, Yevropa xavfsizligini ta’minlash va iqtisodiyot faoliyatining uzluksiz davom etishida muhim ahamiyatga ega.
Yevrokomissar ushbu masalani Shimoliy Atlantika kengashi hamda NATO bosh kotibi Mark Ryutte bilan muhokama qilishni rejalashtirmoqda.
Kubilyusning bildirishicha, tinchlik davrida harbiy ehtiyojlar uchun yoqilg‘i iste’moli umumiy hajmning taxminan 8 foizini tashkil etadi. Harbiy inqiroz yuzaga kelganida esa bu ko‘rsatkich sezilarli darajada oshishi mumkin. Shu bois Yevropa Ittifoqi tinchlik davrida aviatsiya yoqilg‘isi yetarli bo‘lishini ta’minlash bilan birga, harbiy inqiroz sharoitida yoqilg‘i ishlab chiqarishni tez sur’atlarda oshirish va yetarli zaxiralarni shakllantirish imkonini beruvchi tizimni yaratishni ko‘zlamoqda.
