Toshkentda MDH va Gruziya davlatlarining kinematografiya rahbarlari uchrashuvi bo‘lib o‘tadi
Uchrashuv mehmonlari “Oltin Humo” kinotaqdimoti va "Debyut-21” yosh ijodkorlar tanlovida ham ishtirok etishi ko‘zda tutilgan.
21-23 dekabr kunlari Toshkentda MDH davlatlari va Gruziya kinostudiyalari direktorlarining kinematografiya sohasidagi hamkorlik bo‘yicha kengashi o‘tkaziladi.
Kengashning asosiy maqsadi harakatlarni birlashtirib, hamkorlikni kengaytirish va yangi mexanizmlarini amaliyotga tatbiq etishdan iborat.
Mazkur forumga Armaniston, Belarus, Gruziya, Ozarbayjon, Moldova, Tojikiston, Turkmaniston, rossiya, Qirg‘iziston, Qozog‘iston va O‘zbekiston davlatlari kinostudiyalari rahbarlari taklif etilgan.
O‘zbekiston kinematografiya agentligi bosh direktori Firdavs Abduxoliqov ushbu kengash 30 yil davomida tarqoqlashgan MDH mamlakatlari kinostudiyasilarini birlashtirish maqsad qilinganini bildirdi:
“30 yil davomida ushbu davlatlar kinosi o‘rtasidagi hamkorlik susayib, tarqoqlashib qolgandi. Minskda bo‘lib o‘tgan festivalda o‘zbek delegatsiyasi MDH mamlakatlari kinostudiyalarini birlashtiradigan mexanizm ishlab chiqish tashabbusi bilan chiqqan edi. Bunday birlik bizga ijodiy va texnik ko‘mak beradi, tajriba almashinuvi jadallashadi, hamkorlikda filmlar ishlab chiqariladi, imkoniyatlarimizni kengaytiradi. Faqat zarurat tug‘ilganidagina yig‘ilmasdan davomiy mexanizmni ishlab chiqishimiz zarur. Kengashning maqomi va shakli esa aynan Toshkentdagi yig‘inda asosiy muhokama mavzusi bo‘ladi.”
Uchrashuv davomida studiyalar vakillarining B2B formatidagi uchrashuvlari, davra suhbatlari o‘tkaziladi, qo‘shma loyihalar, kinostudiyalar va kinokonsernlar faoliyatining samarali modellari muhokama qilinadi.
Bundan tashqari, hamkorlik bo‘yicha yagona yo‘l xaritasining loyihasi ishlab chiqiladi. Direktorlar kengashi tarkibiga yangi ishtirokchilar qabul qilinishi ham ko‘zda tutilgan.
Kengashda ishtirokchilar o‘z kinostudiyalarining rejalarini taqdim etishadi va faoliyat modellarini bilan tanishtiradi. Shuningdek, uyushmaning rasmiy maqomi muhokamasi va tanlovi bo‘lib o‘tadi.
Eslatib o‘tamiz, avvalroq Toshkentda Butunrossiya kinematografiya instituti filiali ochilishi hamda "Oltin Humo" milliy kinotaqdimoti qachon o‘tkazilishi maʼlum bo‘lgani haqida xabar berilgandi.
Cho‘lponoy Ahmedova
