Fuqaroni tekshirish uchun IIBga olib borish tartibi bekor qilinmoqda
Endi ma’lumotlar joyida tekshiriladi.
O‘zbekistonda fuqarolarni ichki ishlar organlariga olib borish tartibi bekor qilinishi mumkin. Bu haqda Yangi O‘zbekistonning 2022–2026-yillarga mo‘ljallangan taraqqiyot strategiyasida ma’lum qilingan.
Unga ko’ra, adolat va qonun ustuvorligini taʼminlash bo‘yicha belgilangan vazifalar doirasida 2022-yilda:
– ijtimoiy himoyaga muhtoj fuqarolarga fuqarolik va maʼmuriy ishlar bo‘yicha davlat hisobidan bepul yuridik yordam ko‘rsatish tartibi joriy etiladi;
– harakatlanish erkinligi cheklangan shaxslarni hisobga olish bo‘yicha yagona elektron reestr yuritilishi yo‘lga qo‘yiladi;
– "E-patrul” tizimi joriy etilib, tekshirish uchun fuqaroni ichki ishlar bo‘limiga olib borish o‘rniga barcha maʼlumotlarni joyida tekshirish tartibi yo‘lga qo‘yiladi;
– qarori, harakati (harakatsizligi) noqonuniy emasligini sudda isbotlash majburiyati, uni qabul qilgan mansabdor shaxsning o‘ziga yuklash tartibi – “aybdorlik prezumpsiyasi” va “sudning faol ishtiroki” tamoyillari joriy etiladi.
