Eron Saudiya Arabistoni bilan munosabatlarni yaxshilamoqchi
Mamlakat tashqi ishlar vaziri bunga tayyorligini maʼlum qildi.
Eron Saudiya Arabistoni bilan munosabatlarni istalgan paytda normallashtirishga tayyor ekanini maʼlum qildi. Bu haqda mamlakat tashqi ishlar vaziri Amir Abdullohiyan Al Jazeera telekanaliga bergan intervyusida aytib o‘tgan.
“Tehron Ar-Riyod bilan munosabatlarni istalgan paytda yaxshilashga tayyor”, – degan Eron bosh diplomati.
Shuningdek, u tez orada mamlakatning Islom Hamkorlik Tashkilotidagi vakili Jidda shahriga qaytishini maʼlum qilgan.
Shu bilan birga Abdulloxiyan mintaqadagi dolzarb masallarni Eron, Saudiya Arabistoni, Misr hamda Turkiya bilan birgalikda muhokama qilishni taklif qilgan.
Siyosatchi Vena shahrida Eron yadro dasturi bo‘yicha muzokaralarga ham to‘xtalib o‘tgan. Uning fikricha, agar G‘arbli hamkorlar zarur siyosiy iroda ko‘rsata olsa, kelishuvga erishish mumkin. Shuningdek, Tehron AQSH sobiq prezidenti Donald Tramp tomonidan joriy qilingan sanksiyalarni bekor qilishni talab qilayotgani taʼkidlangan.
Abdullohiyanning qo‘shimcha qilishicha, “Kelajakdagi erishiladigan istalgan kelishuvlar Eronga hech qanday to‘siqsiz neft sotish va daromad olish imkonini berishi kerak”.
Avvalroq Eron prezidenti Ibrohim Raisiy Donald Trampni sudga berish kerakligini https://zamon.uz/uz-to/detail/trampni-sudga-berish-kerak---eron-prezidenti-dunyo aytgandi.
Jahongir Qo'ziyev
