"Tolibon" o‘zining ashaddiy dushmanlaridan birini hukumatga taklif qildi.
Bu haqda Erondagi muzokaralarda ma’lum qilingan.
“Tolibon” mashhur qo‘mondon Ismoil Xonni hukumatga taklif qildi. Bu haqda “Sputnik Afganistan” xabar berdi.
Ma’lumotlarga ko‘ra, Afg‘oniston tashqi ishlar vaziri vazifasini bajaruvchi Amirxon Mutaqqiy bu haqda Tehrondagi muzokaralar vaqtida ma’lum qilgan. U Ismoil Xon va Eron tashqi ishlar vaziri Amir Abdullaxiyan bilan muzokaralar paytida bosh vazir Muhammad Hasan Ohundzodaning taklifini yetkazgan. Mulla Ohund 20 nafar yirik harbiy yetakchilar va davlat arboblarini “Tolibon” tomonidan tuziladigan inklyuziv hukumat tarkibiga kirishga taklif qilgan. O‘z navbatida Ismoil Xon 25 martga qadar vaqt so‘ragan. Shu bilan hozirda Eron TIV va toliblar tomonidan bu haqda rasmiy ma’lumot berilmadi.
Ma’lumot o‘rnida: Ismoil Xon – mashhur afg‘onistonlik qo‘mondon. U avval sovet qo‘shinlariga, so‘ngra “Tolibon”ga qarshi kurashgan. “Hirot sheri” nomi bilan mashhur. 2021 yil avgust oyida u toliblar tomonidan asirga olingan bo‘lsa-da, keyinchalik Eronga chiqib ketgan.
Avvalroq Pokiston Afg‘oniston bilan chegarada to‘siqlar qo‘yishni davom ettirishini ma’lum qilgandi.
Jahongir Qo'ziyev
