JSST: Homilador ayollar ham COVID-19 ga qarshi emlanishi kerak
Tashkilotga ko'ra, virus homilador onadan bolaga yuqmaydi.
Koronavirusga qarshi dori-darmonlar va vaksinalar homilador ayollarda ham sinovdan o'tkazilishi kerak, chunki aholining ushbu toifasi yuqori xavf ostida. Bu haqda Jahon sog‘liqni saqlash tashkiloti rahbari Tedros Adhanom Gebreyesus bo‘lib o‘tgan brifingda ma’lum qildi.
"Barcha mamlakatlarda homilador ayollar o'z hayoti va farzandlarining hayotini himoya qilish uchun vaksinalardan foydalanish imkoniyatiga ega bo'lishi juda muhim. Shuningdek, biz homilador ayollarni yangi davolash usullari va klinik sinovlariga qo'shishga chaqiramiz", dedi u.
Shu bilan birga, Gebreyesus virusning ona qornida yoki tug‘ilish vaqtida bolaga yuqishi holatlari nihoyatda kam uchrashini va ona sutida virusning faol zarralari aniqlanmaganini ta’kidladi. Shu munosabat bilan JSST rahbari COVID-19 bilan kasallangan ayollarni yangi tug‘ilgan farzandlaridan ajratmaslikka chaqirdi.
"Bu tug'ilishdan keyingi dastlabki kunlarda bolalarning sog'lig'i va farovonligiga zarar yetkazishi mumkin", - dedi u.
Avvalroq JSST "Omicron" shtammi dunyoda har uch kunda ikki barobarga ko'payishi haqida ogohlantirgandi.
