Umra to‘lovlari nega oshgani bo‘yicha ma’lumot berildi
Narx oshirilishiga Saudiya qirolligida 15 foiz qo‘shimcha qiymat solig‘i joriy etilgani sabab bo‘lgan.
Ijtimoiy tarmoqlarda 2020-yil fevral oyiga qadar qilingan Umra to‘lovi miqdoriga yana narx qo‘shilgani bo‘yicha tarqalgan ma’lumotlarga O‘zbekiston Musulmonlari idorasi munosabat bildirdi.
Bayonotda quyidagilar ma'lum qilingan:
1) Koronavirus pandemiyasi sabab mehmonxonada 4 kishilik xonaga 2 nafar ziyoratchi, 50 o‘rindiqli avtobusga 25 kishi joylashtirish, oziq-ovqatlar endi maxsus qadoqlangan holda tarqatilishi, qo‘shimcha shifokorlar va maxsus dori-darmonlar bilan ta’minlash kabi talablar o‘rnatilgan va bu avvalgi narxga ta’sir qilgan;
2) Saudiya qirolligida 15 foiz qo‘shimcha qiymat solig‘i joriy etilgan;
3) Makka va Madina shaharlarida Ikki Haramga yaqin bo‘lgan 5 yulduzli mehmonxonalar buyurtma qilingan. Masjidi Nabaviyga yaqin bo‘lgan “Pulman zam-zam” va Baytulloh atrofidagi “Jabal Umar” hududida joylashgan mehmonxona olingan;
4) O‘zbekiston Saudiyada umra safarini tashkil qilish bo‘yicha bir necha shirkat takliflarini o‘rgangan. Bunda avvalo shirkatlarning Saudiya haj va umra vazirligi talabiga asosan umrani tashkil etish bo‘yicha lisenziyasi bor yoki yo‘qligiga e’tibor qaratilgan;
5) Oldingi uzoq yillik hamkor shirkat ham pandemiyadan keyin lisenziya ololmagani uchun boshqa, imkoniyati kengroq “Abu Sarhad” shirkati bilan shartnoma imzolangan;
6) Har bir Haj yoki umra mavsumi to‘lovlar bankdagi maxsus hisob raqamda saqlanadi. Bu mablag‘lardan boshqa maqsadda foydalanish imkoniyati yo‘q;
7) 2020-yil fevral oyiga qadar Umra uchun to‘lov amalga oshirgan, hozirda borish istagidan qaytgan fuqarolarning murojaatiga asosan to‘lovlari qaytarib berildi.
