Yevropaga kuchli to‘fon zarba berdi
Bir qator mamlakatlar suv toshqini ostida qolgan.
Yevropa mamlakatlariga ketma-ket bo‘ronlar yopirilmoqda. Bir qator mamlakatlarda yuz minglab uylar elektr energiyasiz qoldi. Skandinaviyada kamida 4 kishi hayotdan ko‘z yumdi. Yo‘llar qulagan daraxtlar tufayli to‘silib qolgan. Germaniyada esa “Nadiya” sikloni oqibatida bir kishi halok bo‘ldi.
Kuchli shamol oqibatida yirtilgan saylov afishasi yo‘lovchining ustiga tushib ketgan. Mamlakat shimolida temir yo‘l harakati qisman to‘xtatildi.
Gamburgda Elba daryosidagi suv sathi sezilarli darajada ko‘tarildi va qirg‘oqlaridan toshdi. Shuningdek to‘fon Daniya, Finlyandiya, Norvegiya, Shvetsiya va Buyuk Britaniyaga ham taʼsir ko‘rsatdi. Daniyada yomon ob-havo tufayli bir qancha ko‘priklar, jumladan, Kopengagen va Shvetsiyaning Malmyo shahrini bog‘laydigan asosiy avtomobil va temir yo‘l yopilgan.
Avvalroq Estoniya qor bo‘roni ostida qolgani haqida xabar qilgandi.
