AQSH Braziliya prezidentiga bosim o‘tkazmoqda
Bunga Rossiya bilan bog‘liq vaziyat sabab bo‘lgan.
AQSH Braziliya prezidentining Rossiyaga tashrifini bekor qilish maqsadida diplomatik bosim o‘tkazmoqda. Bu haqda “TASS” xabar berdi.
Nashrning "Folha de S.Paulo" gazetasiga tayanib maʼlum qilishicha, bundan ko‘zlangan maqsad Ukrainadagi vaziyat fonida RF prezidenti Vladimir Putinni diplomatik izolyatsiya qilish. Gazeta maʼlumotlariga ko‘ra, Jair Bolsonaru (Braziliya prezidenti)ning Moskvaga tashrifi AQSH diplomatlarida xavotir uyg‘otmoqda, sababi — bu Braziliyaning Rossiyaning Yevropa sharqidagi xatti-harakatlarini qo‘llab-quvvatlashi to‘g‘risida o‘ziga xos signal bo‘lishi mumkin.
Bayden administratsiyasining fikricha, Bolsonaru tashrifining bekor qilinishi Putinga “Ukraina chegarasidagi harbiy ishtiroki qisqarmagan taqdirda, diplomatik izolyatsiyaga tushishi mumkinligi”ni ko‘rsatadi.
Braziliya TIV, o‘z navbatida, AQSH davlat departamentiga prezident tashrifini geosiyosiy prizmadan tashqarida ko‘rishni maslahat bermoqda.
Avvalroq AQSH Rossiya-Ukraina chegarasidagi vaziyat ortidan Yevropaga qo‘shimcha kuch jo‘natgani to‘g‘risida xabar qilingandi.
